لو يسألوني شو الوطن
رح رد ما بعرف
عن جد ما بعرف
لا كيف، وين، وليش
كلِّ ال بعرفو ضوّ وِمْوَيّ ومِلِح
بِمْرارتي غلّوا سوا
ونزّوا مِنِ عْيوني دمع
عندي الوطن إيمان جوّاتي
متل العشق
بيني وبين حالي
حبّة حلو بيستطعما لساني
عندي الوطن سكنة طفل غفيان
هلق صرت بعرف بهالغربة لشو
كل ما شفت إبني المسا غفيان
بيعنّ ع بالي البكي
بيطلع ع بالي بوّس عيونو
وبحضني هدهدلو
مرمغ حنيني ببحر شعراتو
ومن غير سبب
يطلع ع بالي غيّر تيابو العتيقة وإنعجق قبل الوقت
إركض ت حضّرلو تياب العيد
شو صار ت بحبّك أنا هالقدّ
ليش ت أنا الداشر متل شتلة بنص الريح
لا بفوت لا بطلع
شي موصَّل شروشي بأنين البين
ساقي الحلم من وشوشات نجوم مطفيّة
متعربط بخيطان ما بتنشاف
ومن غير سما بتلملم جروحي
لامم تحت جرحي السما